قعدة صحاب ولا بيزنس

كتابة : إينار

قعـدة صحاب ولا بيزنس؟

في قعدة صحاب ع القهوة طلع “أحمد” بفكرة تساوي مليون جنيه، وكلمة من هنا لـ رأي من هنا اتفق مع “أمجد” يكون شريكه وأهو اللي يعرفه أحسن من اللي ميعرفوش..

ده مكنش سبب كفاية أنهم يشاركوا بعض عشان مفهوم الشراكة عندهم كان مختلف، وده اللي هتعرفه دلوقتي..

يا ترى مين فيهم كان الـ leader طبعا جه في بالك عقدة “أنا المدير”.. 😃

الحقيقة سألتهم بيتعاملوا مع بعض إزاي كـ بيزنس، بعيد عن العشم..

وكان الرد “إحنا أصحاب ما بينا بيزنس”، وأنهم عملوا عقد حلو جدًا، واتفقوا على الطريقة اللي هيتعاملوا بيها..

✓ زي

  • أنك تختار اللي يدعمك، وفي نفس الوقت تكملوا بعض.
  • خلى كلامكم دايما ” محتاجين نشوف” و”نشتغل عشان نحافظ على البيزنس بتاعنا..”.

“أحمد” حكالي الحكاية اللي ألهمته للإتفاق ده بينه وبين “أمجد” بيقول:

الدكتور “أحمد زويل” حكى في مقابلة تليفزيونية، إن إبنه كان بيجهز نفسه يدخل إنتخابات الطلبة.

قال إنه سأل إبنه: “عايز تكون الرئيس؟”.

 فـ الإبن جاوب إنه هيترشح لمنصب “نائب” الرئيس، ولكن

زميله في الفصل هو اللي هيرشح نفسه لمنصب الرئيس..!

دكتور زويل بيقول إن الطابع المصري غلب وقال لإبنه مستغرب:

“أنت إبن زويل، ليه مش عايز تكون الرئيس؟”..

الإبن وضح فكرته بإن صفات الرئاسة والقيادة مش عنده، لكن هو ممتاز في التخطيط والإهتمام بتفاصيل التنفيذ.

في حين إن صديقه بيتمتع بكاريزما القيادة، وبكدا يكون بـ تخطيط قوي وقائد موهوب هيوصلوا للهدف بسهولة وهيقدروا يتغلبوا على المنافسين ليهم.

دكتور زويل أُعجب بفكرهم جدا وأشاد بيه..

🔰 هنا هتفهم أنه..

  • ضروري جدا وأنت بتدور على شريك نجاحك في الـ Startup تتعامل أنك مش leader عليه ولا هو leader عليك إنتوا بتكملوا بعض.
  • لازم الفريق يبقى على مستوى الكفاءة عشان يحصل بينكم تناغم وانسجام وده هينعكس على مستوى جودة شغلك.

وأخيرا أتمنالك تلاقي شريكك في البيزنس ويكون عنده نفس الهدف وطريقكم واحد، وتحقق نجاح كبير.

للمزيد من المقالات :